Identiteit

'n Skool van uitnemende gehalte, wat innoverende, eietydse opvoeding en onderwys, die doeltreffende implementering en monitering van die kurrikulum, en visioenêre, vernuwende en verantwoordelike beheer en bestuur, met sensitiwiteit vir diversiteit, insluit.

'n Skool waar die beste belang van ons leerders in die middelpunt staan van alles wat ons doen.

'n Skool waar opvoeders in goeie omstandighede werk en op innoverende wyse as rolmodelle funksioneer.

'n Skool waar ouers meelewend en konstruktief saam met die skool dink en doen.

'n Skool waar hoë morele waardes uitgeleef word en waar ons leerders hierdie waardes aanleer, insluitende respek vir mense en die omgewing, integriteit, eerlikheid, betroubaarheid, nie-diskriminasie, gehoorsaamheid, lojaliteit en diensbaarheid.

'n Skool waar leerders in geborgenheid en veiligheid tot hulle volle potensiaal in hulle volle menswees opgevoed word, met 'n gesonde balans tussen die verskillende fasette van hulle lewens (intellektueel, fisies, geestelik, sosiaal en kultureel).

'n Skool waar leerders opgevoed word om later gemaklik, suksesvol en met vertroue te kan funksioneer in die Suid-Afrikaanse werklikheid binne die vroeg-21ste eeuse wêreldwye gemeenskap.

'n Skool waar daar ruimte is vir opvoeders en leerders om hulle godsdienstige oortuigings uit te leef, sonder dwang, en met respek teenoor die godsdienstige oortuigings van minderhede sowel as die meerderheid.